上個月我有一個朋友叫我去一個Musical嘅casting，心諗跳舞我就得姐，又唱又跳仲要做埋戲真係鬼識咩。不過最後我都抱住"試吓唔會死"嘅心態去咗遴選。
一開始casting 首先要介紹自己。其他人既內容大概係曾經係個文員，又或者讀左啲唔相關嘅科目但係一直好嚮往舞台，所以放棄咗過去嘅一切好希望做個全職演員。而我嘅自我介紹係: 過去果11年我好努力咁追夢，曾經係一個跳舞老師、演唱會舞蹈員同埋一個排舞師，現職office。我感覺到側邊嘅人聽到"現職office"有啲驚訝，但係我唔想喺夢想末實現之前elaborate 俾其他人聽，我返呢份工係我自己嘅原因，有自己嘅夢想追。
其實我點解突然之間有個想寫blog嘅衝動呢? 話說上年30歲生日之後突然有一股勇氣令我去追番20歲嘅夢 - 唱歌。我最後真係參加左一個公開唱歌比賽寫下hastag #三十歳時你敢面對自己20歲時的夢想嗎。雖然最後喺final輸左，不過我竟然意外地收到好多朋友，甚至陌生人嘅支持同回應，甚至有人inbox 我話我知呢個hastag令佢地諗番起以前嘅夢。我突然領悟到以「生命影響生命」既威力而開始決心寫呢一個blog去鼓勵身邊嘅人用實際行動去開實現自己嘅理想。轉做 social media 嘅其中一個原因亦都係因為想學習如何成為一個blogger。
擁有夢想唔難，實現夢想先至係最難。 喺踏上追夢呢條路之前一定要知道，就算做夢，都要有做得起夢嘅實力同埋肯做夢嘅努力。開始嘅時候你不斷學習不斷嘗試，但係就連一個路標都見唔到。然後你就會開始質疑究竟呢一條路係咪真係適合自己? 點解唔可以平平淡淡咁做返個人，硬係要博一舖行另外一條路呢? 受到打擊係必經嘅過程，亦都係令最多人跌倒跪低嘅時候。其實你只要肯捱過呢一關就會發現呢啲打擊原來係實現夢想嘅一種段練。當你捱過令所有人都跌倒跪低嘅時刻，夢想就會越嚟越近。我都曾經跪低過好幾次，勇氣令我爬番起身再繼續向前前進，去到一個我當初都估唔到會去到嘅地方。
琴日突然收到電話，話我casting中左個小角，出年有共四十一場嘅公開演出。我竟然有機會成為一個演員！呢個世界其實真係有好多野唔試過都唔會知道自己係咪有能力做到。實現夢想嘅第一部就係「敢想」，然後「敢做」再出盡奶力去實踐。
人一輩子可以活出幾個精彩人生你話幾好呢！我好慶幸自己可以做咗好多自己想做嘅嘢，唔同嘅職業同唔同嘅角色。好多女人都成日話怕30歲30歲，我最後都平平安安咁過左一年啦！當然，今日吹蠟燭嘅願望都係同一個啦，希望可以有機會擔任另一個新角色：成為一個女朋友同一個母親。共勉之 #三十一歲生日快樂
Photo credit to Kirk Cheung Photography
Search